အခန်း (၁)  အရှုပ်ထုပ် ဗီလိန်နှင့် ရင်းနှီးမြှုပ်နှံမှုစနစ်

ဝမ်မုတစ်ယောက် စိတ်ပျက်အားငယ်နေမိသည်။သူသည် ကမ္ဘာကူးပြောင်း လာခဲ့ခြင်းဖြစ်သည်။

ကျင့်ကြံခြင်းကမ္ဘာသို့ ရောက်ရှိလာပြီး ထိပ်တန်းမျိုးရိုးမြင့်မိသားစုတစ်ခု၏ သခင်လေးတစ်ဦးပင် ဖြစ်လာခဲ့သည်။ သို့သော် ထိပ်တန်းမိသားစုတွင် လူဝင်စားဖြစ်လာပါလျက်နှင့် အဘယ်ကြောင့် စိတ်ပျက်နေရသနည်း။

အကြောင်းမှာ သူ၏သခင်လေးဘဝသည် ကုန်ဆုံးလုနီးပါး ဖြစ်နေသောကြောင့်ပင်... ဝမ်မု အစားထိုးဝင်သွားသောခန္ဓာကိုယ်ပိုင်ရှင်မှာ ကောင်းကင်ဘုံကိုပင် ဆန့်ကျင်နိုင်သည့် နောက်ခံအင်အားရှိသူ ဖြစ်သည်။

သူ၏အဖိုးမှာ-

မဟာရှရှန်းနိုင်ငံတော်၏ ဝေမင်းသားဖြစ်ပြီး ဧကရာဇ်ကို လက်ဝါးကြီးအုပ်ကာ နယ်စားပယ်စားများကို အမိန့်ပေးနေသူဖြစ်သည်။ နန်းတော်ထဲသို့ ဓားလွယ်လျက်၊ ဖိနပ်စီးလျက် ဝင်ထွက်နိုင်ပြီး ညီလာခံတွင်လည်း အမည်ခေါ်အလေးပြုခံရစရာမလိုသော အရှိန်အဝါမျိုး ရှိသည်။ ငယ်ရွယ်သောရှဧကရာဇ်ပင်လျှင် သူ့ကိုမြင်လျှင် တုန်ရင်နေရသည်။

သူ၏အဖွားမှာ-

မြောက်ပင်လယ်၏အကြီးဆုံး ကုန်သည်အဖွဲ့အစည်းဖြစ်သော လန်ယာကုန်သည်အဖွဲ့ကို တည်ထောင်သူဖြစ်ပြီး တိုင်းပြည်နှင့်အပြိုင် ချမ်းသာကြွယ်ဝသူဖြစ်သည်။

သူ၏အဖေမှာ-

နယ်စပ်ဒေသကိုစိုးမိုးထားသည့် စစ်ရေးကျောင်းတော်မှလူသတ်သမားဟု အမည်ကျော်သူ ဖြစ်သည်။ သူသည် အရှေ့ပင်လယ်ရှိ ဝါမျိုးနွယ်ဝင်မိစ္ဆာပေါင်း ၄သိန်းကို သတ်ဖြတ်ခဲ့ဖူးပြီး သူ၏ကြောက်မက်ဖွယ်ဂုဏ်သတင်းကြောင့် ကလေးငယ်များပင် ညဘက်ငိုသံတိတ်သွား ရသည်။

သူ၏အမေမှာ-

ထိပ်တန်းဂိုဏ်းကြီး ၁၀ ခုအနက် တစ်ခုဖြစ်သော မြောက်ပိုင်းအမှောင်ထုသန့်စင်နယ်မြေ၏ လက်ရှိအရှင်သခင်မဖြစ်ပြီး လွန်ခဲ့သော နှစ်ပေါင်းသုံးထောင်အတွင်း ချန်းယွမ်လောက၏ နံပါတ်တစ် ဓားကျင့်ကြံသူ ပါရမီရှင်အဖြစ် ချီးကျူးခံရသူဖြစ်သည်။

နဂါးက နဂါးကိုမွေး၊ ဖီးနစ်က ဖီးနစ်ကိုမွေးသည်ဟူသော ဆိုရိုးအတိုင်း ထိုကဲ့သို့သော သွေးမျိုးဆက်ရှိသည့် ဝမ်မုသည် မည်မျှပင်ညံ့ဖျင်းပါစေ ထိပ်တန်းကျင့်ကြံခြင်းပါရမီရှင် ဖြစ်နေသင့်သည်။

သို့သော် လက်တွေ့မှာ ထိုသို့မဟုတ်ပေ။

ခန္ဓာကိုယ်ပိုင်ရှင်ဟောင်းမှာ မိဘများတားမြစ်နယ်မြေတစ်ခုတွင် ပိတ်မိနေစဉ် မွေးဖွားလာခဲ့ခြင်းဖြစ်ရာ လျှို့ဝှက်ဆန်းကြယ်သော ကျိန်စာတစ်ခု၏စွမ်းအားက ခန္ဓာကိုယ်ထဲသို့ ကျူးကျော်ဝင်ရောက်ခဲ့ပြီး ကျင့်ကြံရန် လုံးဝမဖြစ်နိုင်သည့် အခြေအနေသို့ ရောက်သွားခဲ့သည်။ နတ်ဆေးလုံးများနှင့် အဖိုးတန်ဆေးဝါးများပင်အကျိုးသက်ရောက် မှု မရှိခဲ့ပေ။

ကျင့်ကြံ၍မရခြင်းကြောင့် အသက်တစ်ရာသာနေရမည့် သာမန်လူသားတစ်ဦးဖြစ်ရတော့ မည်ဟု ဆိုလိုခြင်းဖြစ်သည်။ ဝမ်မုတို့ကဲ့သို့ ကျင့်ကြံသူမိသားစုအတွက်မူ ၎င်းမှာ မွေးကတည်းက သေဆုံးခြင်းနှင့် မည်သို့ထူးခြားမည်နည်း။

ဝမ်မုမိသားစု၏မျိုးဆက်သုံးဆက်တိုင်တိုင်တစ်ဦးတည်းသော သားသမီးမျိုးဆက် ဖြစ်ခဲ့သည်။ ဤအခြေအနေကိုကျော်လွှားရန် သူတို့သည် နည်းလမ်းပေါင်းစုံကို စဉ်းစားခဲ့ကြသည်။

ဥပမာအားဖြင့်-

မဟာရှအင်ပါယာတော်ဝင်မျိုးနွယ်၏ မာရှယ်ကင်းမျိုးဆက်တွင် မွေးရာပါ ထူးကဲအရိုး ပါရှိသော ပါရမီရှင်ကလေးတစ်ဦး မွေးဖွားလာခဲ့သည်။ ထိုကလေး အသက်တစ်လသား အရွယ်တွင် ဝေမင်းသား (ဝမ်မု၏အဖိုး)သည် ကိုယ်တိုင်သွားရောက်ကာ ထိုအရိုးကို ထုတ်ယူပြီး ဝမ်မုထံသို့အစားထိုးရန် ကြိုးပမ်းခဲ့သည်။ သို့သော် အစားထိုးခြင်းမှာ မအောင်မြင်ခဲ့ရုံသာမက ထိုကလေးသည် အခွင့်အရေးတစ်ခုရကာ အရိုးကို ပြန်လည်တည်ဆောက်နိုင်ခဲ့ပြီး ဝေမင်းသားကို ပြန်လည်တော်လှန်သည့် သူပုန်တပ်တွင် ပါဝင်လာခဲ့သည်။

နောက်ထပ်ဥပမာတစ်ခုအနေဖြင့်-

တောင်ပိုင်းဒေသတွင် နှစ်ပေါင်းတစ်သိန်းသက်တမ်းရှိ ကမ္ဘာသန့်စင်ကြာဖြူမှ လူဝင်စားလာသည့် အဆင့်မြင့်မိစ္ဆာနတ်ဘုရားတစ်ပါး ရှိကြောင်း ဝမ်မု၏မိသားစု ကြားသိခဲ့သည်။ ထိုမိစ္ဆာ၏ကြာစေ့များသည် ကျိန်စာများကို သန့်စင်ပေးနိုင်စွမ်းရှိသည်။ ထို့ကြောင့် ဝမ်မု၏အမေသည် ဓားတစ်လက်ဖြင့် တောင်ပိုင်းဒေသသို့ တစ်ကိုယ်တော် သွားရောက်ကာ ခုနစ်ရက်၊ ခုနစ်ည တိုက်ခိုက်ပြီး ထိုမိစ္ဆာကို သတ်ဖြတ်ခဲ့သည်။

သို့သော်ကြာစေ့မှာ ဝမ်မုအတွက် အလုပ်မဖြစ်ခဲ့ရုံသာမက ထိုမိစ္ဆာ၏သွေးနှောရင်သွေးငယ် မှာ လွတ်မြောက်သွားပြီး လူသားနိုင်ငံများအတွင်းခိုအောင်းကာ နောက်ပိုင်းတွင် ချမ်းသာကြွယ်ဝသော ကုန်သည်အဖွဲ့နှင့် ပတ်သက်မိပြီး အင်အားကြီးမားလာခဲ့သည်။

နောက်ထပ်လည်း ရှိသေးသည်။

ရှေးခေတ်က အင်မတန်အစွမ်းထက်သော်လည်း ယခုခေတ်တွင် အသုံးမကျတော့သည့် တောရိုင်းသန့်စင်ခန္ဓာကိုယ်ပိုင်ရှင်တစ်ဦးတွင် အဖိုးတန်ခရမ်းရောင်အငွေ့အသက်ရှိနေသည် ကို လန်ယာကုန်သည်အဖွဲ့မှမန်နေဂျာက သိရှိသွားပြီး ဝမ်မုအတွက် လုယူရန် ကြိုးစားခဲ့ သည်။ ထိုသူမှာ တားမြစ်နယ်မြေအတွင်းသို့ မောင်းထုတ်ခံခဲ့ရသော်လည်း အသက်ရှင်ရုံတင်မကဘဲ နှစ်အနည်းငယ်အကြာတွင် မူလသန့်စင်နယ်မြေ ၏ အထူးတပည့်ဖြစ်လာကာ ဝမ်မု၏မိသားစုနှင့် ထိပ်တိုက်ရင်ဆိုင်လာခဲ့သည်။

ဝမ်မု အသက်၁၅ နှစ်အရွယ်တွင်လည်း မြောက်ပိုင်းအမှောင်ထုသန့်စင်နယ်မြေမှ တပည့်တစ်ဦး၏ချစ်သူကို အတင်းအဓမ္မ လုယူခဲ့ဖူးသည်။ ထိုသူကို အရှက်ခွဲကာ စေ့စပ်မှုကို ဖျက်သိမ်းစေခဲ့ရာ ထိုလူငယ်က "မြစ်တစ်ဖက်မှာအနှစ်သုံးဆယ်၊ မြစ်တစ်ဖက်မှာ အနှစ်သုံးဆယ်၊ ဆင်းရဲတဲ့လူငယ်ကို အထင်မသေးနဲ့" ဟု ကြွေးကြော်ခဲ့သည်။ ထိုသူမှာ ကျင့်ကြံခြင်းစွမ်းအားများဖျက်ဆီးခံရပြီး ဆေးသမားဘဝသို့ ရောက်သွားခဲ့သော်လည်း သုံးနှစ်ကြာပြီးနောက် အစွမ်းထက်စွာ ပြန်လည်ပေါ်ပေါက်လာခဲ့သည်။

ကြည့်လိုက်ပါဦး

သူတို့မိသားစုရန်စခဲ့သည့်သူတိုင်းမှာ ကံကြမ္မာသားတော်များသာ ဖြစ်ကြသည်။ ဝမ်မု၏ အဆင့်အတန်းမှာ ထိုကံကြမ္မာသားတော်များ၏အမုန်းကိုခံရမည့်၊ အနိုင်ယူခံရမည့် ကျောက်ခဲတစ်ခုသဖွယ် ဗီလိန်စစ်စစ် ဖြစ်နေသည်။

မကြာသေးမီက ဝမ်မုနေထိုင်ရာကျွန်းပေါ်တွင် သတင်းဆိုးများ ပျံ့နှံ့နေသည်။

လန်ယာကုန်သည်အဖွဲ့ အရှုံးပေါ်နေခြင်း၊ ဝမ်မု၏အမေပိုင်ဆိုင်သောဂိုဏ်းမှ တပည့်များ တိုက်ခိုက်ခံရခြင်းနှင့် ဝေမင်းသား၏တပ်ဖွဲ့များ ရှုံးနိမ့်နေခြင်း စသည့်သတင်းများ ဖြစ်သည်။

မိသားစုလူကြီးများက သူ့ကိုစိတ်မပူစေရန် သတင်းကောင်းများသာ ပြောလေ့ရှိသော်လည်း ယခုကဲ့သို့ သတင်းဆိုးများ သူ့နားထဲရောက်လာသည်မှာ အခြေအနေမှာ သူသိထားသည် ထက် များစွာဆိုးရွားနေပြီဟု ဆိုလိုခြင်းဖြစ်သည်။

ဝမ်မုမှာ သာမန်လူတစ်ယောက်သာဖြစ်သည်။ အကယ်၍ သူ၏မိသားစုပျက်စီးသွားပါက သူ ဘယ်ကိုပြေးရမည်နည်း။

ဝမ်မု စိတ်ပျက်အားငယ်နေစဉ်မှာပင် သူ၏စိတ်ထဲတွင် အသံတစ်ခုထွက်ပေါ်လာလေသည်။

【တိင်】

【ပိုင်ရှင်၏ခန္ဓာကိုယ်ပေါာရှိ လျှို့ဝှက်ဆန်းကြယ်သောကျိန်စာကို စစ်ဆေးတွေ့ရှိရသဖြင့် ဖယ်ရှားပေးနေပါသည်။】

【ကျိန်စာဖယ်ရှားခြင်း ပြီးဆုံးပါပြီ စနစ်နှင့် ချိတ်ဆက်နေပါသည်။】

【ရင်းနှီးမြှုပ်နှံမှုစနစ် နှင့် ချိတ်ဆက်မှု အောင်မြင်ပါသည်】

"စနစ်"

ဝမ်မု၏ မျက်လုံးများ တောက်ပသွားသည်။

ထို့နောက် စနစ်နှင့်ပတ်သက်သော အချက်အလက်များ သူ၏စိတ်ထဲတွင် ပေါ်လာသည်။

【ပိုင်ရှင်သည် မိမိပတ်ဝန်းကျင်ရှိပါရမီရှင်များကို ရင်းနှီးမြှုပ်နှံပြီး သူတို့နှင့် ချိတ်ဆက်နိုင် သည်။ ထိုအချိန်မှစ၍ သူတို့၏ကျင့်ကြံမှုရလဒ်များမှရာခိုင်နှုန်းတစ်ခုကို ပြန်အမ်းငွေအဖြစ် ပိုင်ရှင်က ပြန်လည်ရရှိမည်ဖြစ်သည်။】

【ရင်းနှီးမြှုပ်နှံမှု ပိုမိုပြည့်စုံလေ ပြန်ရရှိမည့်အချိုးအစား ပိုများလေဖြစ်သည်။】

【ရင်းနှီးမြှုပ်နှံမှု ကုန်ကျစရိတ်နှင့်ပြန်အမ်းငွေကို ပစ်မှတ်၏တန်ဖိုး၊ ပါရမီနှင့် အလားအလာပေါ်မူတည်၍ တွက်ချက်မည် ဖြစ်သည်။】

【သတိပေးချက်- ပိုင်ရှင်ရရှိသော ပြန်အမ်းငွေများသည် ရင်းနှီးမြှုပ်နှံခြင်းခံရသူ၏ကျင့်ကြံမှုတိုးတက်မှုကို ထိခိုက်စေခြင်း မရှိပါ။】

ဝမ်မု စဉ်းစားလိုက်သည်။ "ဆိုလိုတာက ငါကိုယ်တိုင်ကျင့်ကြံစရာမလိုဘဲ တခြားသူတွေကို ပိုက်ဆံပုံအောပြီး ရင်းနှီးမြှုပ်နှံရုံနဲ့ ငါကပိုသန်မာလာမှာပေါ့"

သူ စမ်းကြည့်ရန် ဆုံးဖြတ်လိုက်သည်။ သူ၏ပခုံးပေါ်ရှိ ငှက်ကလေးကို ကြည့်လိုက်သောအခါ ဖန်သားပြင်တစ်ခု ပေါ်လာသည်။

အမည်: ဝမ်ဖူကွေ့

အသက်: ၈ နှစ် (ကလေးဘဝ)

မျိုးနွယ်: ရွှေတောင်ပံဂဠုန်လင်းယုန်

အဆင့်: ရွှေအမြုတေအလယ်အဆင့်

ပါရမီ: နတ်ဘုရားအဆင့် (မူလစွမ်းအား လိုအပ်နေခြင်း၊ သွေးမျိုးဆက် နိုးထခြင်း မရှိသေး)

ထူးခြားချက်: နဂါးစားသုံးသူ - သာမန်နဂါးမျိုးနွယ်များအပေါ် ပြင်းထန်သော သွေးမျိုးဆက် ဖိနှိပ်မှုရှိသည်။ နဂါးမျိုးနွယ် သို့မဟုတ် နဂါးစွမ်းအင်ပါသော ဆေးဖက်ဝင်အပင်များကို စားသုံးခြင်းဖြင့် ၎င်း၏မူလစွမ်းအားကို ဖြည့်တင်းပေးနိုင်သည်။ သွေးမျိုးဆက် နိုးထပြီးနောက် ကျင့်ကြံမှုအရှိန်နှင့် တိုက်ခိုက်ရေးစွမ်းရည်မှာ ၁၀ ဆကျော် မြင့်တက်လာလိမ့်မည်။

ရင်းနှီးမြှုပ်နှံမှုအကဲဖြတ်ချက်: အလားအလာ အလွန်ကောင်းမွန်သည်၊ ရင်းနှီးမြှုပ်နှံရန် သင့်တော်သည်။

ဝမ်မုသည် ကျင့်ကြံ၍မရသော်လည်း အသိပညာတော့ ရှိသည်။ ဤကမ္ဘာတွင် ကျင့်ကြံသူ၏ ပါရမီကို အနိမ့်၊ အလယ်၊ အမြင့်၊ ထိပ်တန်း၊ နတ်ဘုရားနှင့် မသေမျိုးအဆင့်ဟူ၍ ခွဲခြားထားသည်။

ဤဂဠုန်ဥကို သူ၏အမေက တားမြစ်နယ်မြေမှ ယူဆောင်လာပေးခဲ့ခြင်း ဖြစ်သည်။ သို့သော် ၎င်းမှာ မွေးရာပါ ချို့ယွင်းချက်ရှိခဲ့ပြီး ဆယ်နှစ်တိုင်တိုင် ပြုစုပျိုးထောင်ခဲ့ရသည်။

"ထူးခြားချက်က နဂါးစားသုံးသူ ဟုတ်လား"

"ဒါဆို နဂါးအဆီအနှစ်ပါတဲ့ ဆေးတွေကို ရင်းနှီးမြှုပ်နှံပေးရင် အကောင်းဆုံးပေါ့"

ဝမ်မု စဉ်းစားနေရင်းသူ၏လက်စွပ်ထဲမှ အလင်းတန်းများ ထွက်ပေါ်လာပြီး ရွှေရောင်အလုံး လေး ၁၂ လုံး ထွက်လာသည်။ ၎င်းတို့မှာ ပင်လယ်ထိန်းနဂါးပုလဲများဖြစ်သည်။ ၎င်းတို့မှာ စစ်မှန်သော နဂါးမျိုးနွယ်၏အဆီအနှစ်များဖြင့် ဖွဲ့စည်းထားသော အလွန်အဖိုးတန်သည့် ရတနာများ ဖြစ်ကြသည်။