အခန်း ၄၆။ ဆွမ့်ပ် ဆားပန့် အမဲလိုက်ပွဲ (၃)

"အားလုံး ရခဲ့ရဲ့လား?"

"ဟုတ်ကဲ့! တစ်ခုမကျန် အကုန်စုဆောင်းခဲ့ပါတယ်!"

အာမန်ဒီ ယူလာပေးသည့် အကြေးခွံအပိုင်းအစများကို ရာဒယ်လ် စစ်ဆေးကြည့်လိုက်သည်။ ပြာပုံထဲတွင် ရှာဖွေတွေ့ရှိခဲ့ရခြင်းဖြစ်သော်လည်း အရေအတွက်မှာ တော်တော်များသည်။

"မလုံလောက်သေးလို့လား? ကျွန်တော် ထပ်ရှာပေးပါ့မယ်!"

ရာဒယ်လ်က ခေတ္တမျှ တုံ့ဆိုင်းသွားသောအခါ အာမန်ဒီသည် ချက်ချင်းပင် နောက်လှည့်ကာ ဆွမ့်ပ် ဆားပန့်၏ အကြွင်းအကျန်များဆီသို့ ပြန်ပြေးသွားတော့သည်။

သူ၏ အမူအရာမှာ တစ်မိနစ်၊ တစ်စက္ကန့်တိုင်းက အဖိုးတန်နေသည့်အလား။ အစကတည်းက ဤကဲ့သို့ တက်ကြွနေသင့်သည်ဟု ရာဒယ်လ် တွေးမိသည်။ ကိုယ်လက်လှုပ်ရှား ကုထုံးများဖြင့် ပြုပြင်ပေးပြီးနောက် အသစ်တစ်ဖန် ပြန်လည်မွေးဖွားလာသော အာမန်ဒီကို ကြည့်ပြီး ရာဒယ်လ် ကျေနပ်မိသွားသည်။

"အရှင်မင်းသား၊ ဒါကို ရှာတွေ့ခဲ့ပါတယ်"

အဝေးတစ်နေရာမှ ဂတ်စတိုသည် ဖြတ်တောက်ထားသော ဆွမ့်ပ် ဆားပန့်၏ အမြီးကို သယ်ဆောင်လာသည်ကို မြင်ရသည်။ ဘေးထွက်ပစ္စည်းများကို စုဆောင်းလိုက်ပါက ကောင်းမွန်စွာ ပြုပြင်ထုတ်လုပ်၍ ရောင်းချနိုင်ပေလိမ့်မည်။

အဆိပ်ဖြေဆေးရည်အတွက် ဆေးပစ္စည်းများကို အကယ်ဒမီကျောင်းသားသစ်များထံ ရောင်းချနိုင်သော်လည်း သားရဲဘေးထွက်ပစ္စည်းများကို ရောင်းချရန်မှာမူ အကယ်ဒမီပြင်ပရှိ ဆိုင်များသို့ သွားရန် လိုအပ်သည်။

'ကျောင်းသားသစ်တွေရဲ့ လိုက်လျောညီထွေဖြစ်အောင် လေ့ကျင့်တဲ့ကာလ ပြီးမှပဲ အပြင်ထွက်လို့ ရမှာပါ'

အဲဒီမတိုင်ခင် မာဆဲလ်လန့် (Marcellent) မြို့ဆီ သွားနိုင်မယ့် နည်းလမ်းရှိမလား? ရာဒယ်လ်သည် ထိုနည်းလမ်းကို ရှာဖွေရန် ဆုံးဖြတ်လိုက်သည်။

ရာဒယ်လ် စောင့်မျှော်နေသော အခွင့်အရေးမှာ မျှော်လင့်ထားသည်ထက် စောစီးစွာ ရောက်ရှိလာသည်။

"ကျောင်းသားသစ်တွေထဲမှာ အကဲဖြတ်စစ်ဆေးမှုကို ပထမဆုံး အောင်မြင်တဲ့သူတွေ ဖြစ်တာပဲ!"

ထူးဆန်းသော သတ္တဗေဒ ပါမောက္ခ ဒွန်တွန်က အားရပါးရ ရယ်မောလိုက်သည်။ သူသည် တကယ်ပင် ဝမ်းသာအားရ ဖြစ်နေပုံရသည်။

"တော်လိုက်ကြတာ! ဟားဟား!"

ပါမောက္ခ ဒွန်တွန်၏ လက်ဝါးကြီးများက ရာဒယ်လ်၊ ဂတ်စတိုနှင့် အာမန်ဒီတို့၏ ကျောပြင်ကို ပုတ်လိုက်ကြသည်။ ပါမောက္ခ၏ လက်က ကျောကို ရိုက်မိတိုင်း ရာဒယ်လ်၏ နားထဲတွင် အချက်ပေးသံ ထွက်ပေါ်လာသည်။

ဖြောင်း!

တိင်။

[အသုံးပြုသူ၏ ခန္ဓာကိုယ်သည် အနည်းငယ် ထိခိုက်ဒဏ်ရာ ရရှိသွားပါသည်။]

[ထူးခြားချက် ‘ထရိုးလ်၏ နှလုံးသား’ ကို အသုံးပြုလိုက်ပါပြီ။]

[သတိပေးချက်! နာကျင်မှုလှိုင်းတစ်ခု ရောက်ရှိလာနေပါပြီ!]

ပါမောက္ခ၏ လက်ချက်မှာ ‘ထရိုးလ်၏ နှလုံးသား’ ကို အသုံးပြုရသည်အထိ ပြင်းထန်လှသဖြင့် ရာဒယ်လ်သည် အသံတိတ် အောင့်ခံလိုက်ရသည်။ ဘေးကို ကြည့်လိုက်သောအခါ ဂတ်စတိုမှာလည်း သူကိုယ်သူ ကုသခြင်းမှော် (Heal) ဖြင့် ကုသနေသည်ကို မြင်လိုက်ရသည်။

ဒီပါမောက္ခက တကယ်ပဲ လူသားလား၊ သားရဲလား?

"ဘာပဲဖြစ်ဖြစ်၊ ဆွမ့်ပ် ဆားပန့်ကို ပထမဆုံး အနိုင်ယူနိုင်တဲ့အတွက် မင်းတို့ကို ဆုပေးရမယ်! မင်းတို့ ဘာလိုချင်လဲ ပြောစမ်း!"

ပါမောက္ခ ဒွန်တွန်၏ စကားကြောင့် ရာဒယ်လ်က ချက်ချင်းပင် မေးလိုက်သည်။

"ဘာမဆို ဖြစ်နိုင်သလား ခင်ဗျာ?"

"အကုန်လုံးတော့ မဟုတ်ဘူးပေါ့ကွာ။ ဒါပေမဲ့ ရှားပါးမှော်သားရဲတွေကို ကြည့်ချင်တာမျိုး၊ ဒါမှမဟုတ် ဝိုင်ဗန်း (Wyvern) ကျောပေါ်တက်စီးချင်တာမျိုးဆိုရင်တော့ ဖြစ်နိုင်ပါတယ်!"

အဲဒါတွေက ရာဒယ်လ် လိုချင်တဲ့အရာ မဟုတ်ပေ။ ရာဒယ်လ်သည် မျှော်လင့်ချက်အနည်းငယ်ဖြင့် မေးလိုက်သည်။

"ဒါဆိုရင် မာဆဲလ်လန့်မြို့ဆီ အပြင်ထွက်ခွင့်ရမလား?"

အဂ္ဂိရတ်အတန်း။

"ဒီရုံးပိတ်ရက်မှာ နင်တို့ မာဆဲလ်လန့်ကို အပြင်ထွက်ခွင့်ရတယ်လို့ ငါကြားတယ်!"

သတင်းကို တစ်နေရာရာမှ ကြားလာပုံရသော အီနက်တီက ရာဒယ်လ်ထံသို့ လာမေးသည်။ ရာဒယ်လ်၏ ဘေးတွင်ရှိသော ဂတ်စတိုက ခေါင်းညိတ်ပြလိုက်သည်။

"ဟုတ်ပါတယ်"

"အလုပ်သင် သူရဲကောင်း၊ နင်လည်း သွားမှာလား?"

ပါမောက္ခ ဒွန်တွန်၏ ဆုလာဘ်မှာ အဖွဲ့လိုက်ပေးခြင်းဖြစ်သဖြင့် ဂတ်စတိုနှင့် အာမန်ဒီတို့သည်လည်း ရာဒယ်လ်နှင့်အတူ အပြင်ထွက်ခွင့်ရမည်ဖြစ်သည်။

"ဟုတ်ကဲ့၊ ဒါတွေအားလုံးက အရှင်မင်းသားကြောင့်ပါပဲ"

ရာဒယ်လ်၏ အဖွဲ့သည် ဆွမ့်ပ် ဆားပန့်ကို ပထမဆုံး အနိုင်ယူနိုင်ခဲ့သည်ဆိုသော သတင်းမှာ ယခုရက်ပိုင်းအတွင်း အကယ်ဒမီ၏ အရေအကြီးဆုံး သတင်းတစ်ခု ဖြစ်နေသည်။ ရာဒယ်လ် ကယ်တင်ခဲ့သော ကျောင်းသားသစ်များက ကောလာဟလများကို ဖြန့်ဝေနေကြသောကြောင့် ဖြစ်သည်။

"ငါလည်း ကြားတယ်။ ရှစ်ယောက်မြောက် မင်းသားက နတ်ဘုရားပေးတဲ့ ဓားသိုင်းပညာနဲ့ ဆွမ့်ပ် ဆားပန့်ကို အနိုင်ယူလိုက်တယ်ဆိုတာလေ။ သူက ဒီလောက်အထိ သူ့စွမ်းရည်တွေကို ဝှက်ထားခဲ့တာတဲ့"

အီနက်တီက ကောလာဟလများကို ရယ်စရာတစ်ခုလို ပြောဆိုနေပြီးမှ မကြာမီမှာပင် ညည်းညူလိုက်ပြန်သည်။

"အား... ငါလည်း ဧရာမ အဆိပ်ဝက်ဝံကို အမြန်ဖမ်းနိုင်ခဲ့ရင် ကောင်းမှာပဲ! ဒါဆိုရင် ငါလည်း မာဆဲလ်လန့်ကို သွားလို့ရမှာ!"

"နင် အဆိပ်ဖြေဆေးကို ဖော်စပ်နိုင်ခဲ့လို့လား?"

ရာဒယ်လ်က မေးလိုက်သောအခါ အီနက်တီ၏ မျက်နှာ ပျက်သွားသည်။

"ဖော်မစပ်နိုင်လို့ မသွားနိုင်တာပေါ့။ ငါသာ နင်တို့နဲ့ တစ်ဖွဲ့တည်း ဖြစ်ခဲ့ရင် ငါတို့ အေးဆေး ဖမ်းနိုင်မှာပဲကို"

အီနက်တီ၏ စကားအဆုံးမှာပင် သူမ၏ နောက်လိုက်များ တစ်နေရာမှ ပေါ်လာကြသည်။

"မင်းသမီးလေး၊ ကျွန်တော်တို့ တောင်းပန်ပါတယ်! ကျွန်တော်တို့က မပြည့်စုံခဲ့လို့ပါ......"

"ဟူး... ကျွန်တော်တို့ကို ယုံကြည်ပြီး အားကိုးခဲ့တဲ့ မင်းသမီးလေးကို ဘာမှမကူညီနိုင်ခဲ့တာ တကယ်ကို ဝမ်းနည်းစရာပါပဲ!"

နောက်လိုက်များ၏ စကားကို နားထောင်ခြင်းဖြင့် အခြေအနေကို ရာဒယ်လ် ခန့်မှန်းနိုင်သည်။ အီနက်တီသည် သူမ၏ ထူးဆန်းသော သတ္တဗေဒ အုပ်စုလိုက် ပရောဂျက်အဖွဲ့တွင် သူမ၏ နောက်လိုက်များကိုသာ ထည့်သွင်းထားပုံရသည်။

"အဲဒါကို သိရင်လည်း မြန်မြန်လုပ်ကြစမ်း! အခုချက်ချင်းသွားပြီး ပေါင်းပင်တွေ နှုတ်ကြတော့!"

အီနက်တီက သူမ၏ နောက်လိုက်များကို ဟောက်လိုက်ပြီး ဆေးဥယျာဉ်ဆီသို့ မောင်းထုတ်လိုက်သည်။

"ငါ့အဖွဲ့ဝင်တွေက အဲဒီလိုလူတွေမို့ ဘာမှအကူအညီမရဘူး။ ငါက သူတို့ထက်တောင် ပေါင်းပင်တွေ ပိုနှုတ်ရသေးတယ်"

ခဏအတွင်းမှာပင် ကျွမ်းကျင်သော အလုပ်သမားတစ်ဦး ဖြစ်လာသည့် အီနက်တီကို ကြည့်ပြီး ရာဒယ်လ် ခဏမျှ စကားမထွက်နိုင်ဘဲ ဖြစ်သွားသည်။

နောက်လိုက်တွေဆိုတာ... တကယ်ပဲ လိုအပ်လို့လား?

ဂတ်စတိုသည်လည်း ရာဒယ်လ်ကဲ့သို့ပင် တွေးမိပုံရပြီး အီနက်တီကို အကြံပြုချက်တစ်ခု ပေးလိုက်သည်။

"မာဆဲလ်လန့်ကနေ နင်လိုချင်တဲ့အရာ ရှိမလား? ငါ ဝယ်ပေးခဲ့ပါ့မယ်"

"တကယ်လား?!"

အီနက်တီသည် ဝမ်းသာသွားသော်လည်း တစ်ခုခုကို သတိရသွားကာ မျက်မှောင်ကြုတ်လိုက်သည်။

"နေပါဦး၊ နင် ငါ့ကို သနားနေတာတော့ မဟုတ်ဘူးမလား? ငါ အကဲဖြတ်စစ်ဆေးမှုကို အမြန်အောင်မှာ မဟုတ်ဘူးလို့ ထင်လို့ အခုလို လုပ်တာလား......"

"အော်... ငါ့အကြံကို သိသွားတာပဲလား?"

"ဟဲ့!"

အီနက်တီက ပုံမှန်အတိုင်း ဒေါသထွက်နေပြီး ဂတ်စတိုက လိမ္မာပါးနပ်စွာ တောင်းပန်နေစဉ်မှာပင်၊ ရာဒယ်လ်သည် တစ်နေရာရာမှ သူ့ကို စိုက်ကြည့်နေသည့် အကြည့်တစ်ခုကို ခံစားလိုက်ရသဖြင့် ပတ်ဝန်းကျင်ကို သတိထားကြည့်လိုက်သည်။ သူ့ကို စောင့်ကြည့်နေသည့် မျက်လုံးများ ပိုမိုများပြားလာသည်ကို သူ အသေအချာ ခံစားနေရသည်။

'သူတို့ ငါ့ကို စပြီး သတိထားမိလာကြပြီ'

ပြိုင်ဘက်အဖြစ်ဖြစ်စေ၊ တစ်မျိုးမျိုးအဖြစ်ဖြစ်စေပေါ့။

ဆွမ့်ပ် ဆားပန့်ကို ဖမ်းဆီးပြီးနောက်တွင် သူသည် ပိုမိုအာရုံစိုက်ခံလာရသည်မှာ သေချာသည်။

‘ဒီလောက်အထိ စွမ်းရည်တွေကို ဝှက်ထားခဲ့တာပေါ့ ဟုတ်လား......’

သူသည် အရင်ဘဝက အတွေ့အကြုံများနှင့် ‘ဟေဒင်စတိုင်’ အခြေခံဆေးရည်ကြောင့်သာ ဖမ်းဆီးနိုင်ခဲ့ခြင်း ဖြစ်သော်လည်း၊ ဝင်ခွင့်စာမေးပွဲတွင် နောက်ဆုံးအဆင့် ရခဲ့သော ရာဒယ်လ်က ယခုကဲ့သို့ ရှေ့ရောက်လာသဖြင့် ကောလာဟလများ ထွက်ပေါ်လာမည်မှာ ဓမ္မတာပင်။

သို့သော် သူသည် မည်သည့် ရှင်းလင်းချက်မှ ပေးရန် ဆန္ဒမရှိပေ။ လူမသိသူမသိ နေထိုင်ရန် ကြိုးစားရန်လည်း သူ မတွေးတော့ချေ။ လွန်ခဲ့သော ၁၇ နှစ်လုံးလုံး သူ ကြိုးစားခဲ့ဖူးသည် မဟုတ်ပါလား? သို့သော်လည်း သူသည် လူသူမရှိသော တစ်နေရာရာမှာသာ အသက်ဆုံးရှုံးရလိမ့်မည်။ လူတွေ သတိထားမိလာပြီဆိုမှတော့ ကောင်းကောင်းမွန်မွန် ထင်ပေါ်နေတာက ပိုကောင်းပေလိမ့်မည်။

အသွင်ပြောင်းမှော်အတန်း။

လက်ကိုင်ပုဝါကို သံမဏိအဖြစ် ပြောင်းလဲလိုက်သော ရာဒယ်လ်ကို ကြည့်ပြီး ပါမောက္ခ သောမတ်စ် အာရိန်းက လည်ချောင်းတစ်ချက် ဟန့်လိုက်သည်။

"မင်း မေဂျာတစ်ခုခု ရွေးပြီးပြီလားလို့ ထပ်မေးချင်တယ်"

"တခြားအတန်းတွေကိုလည်း တက်ကြည့်ပြီးမှ ဖြည်းဖြည်းချင်းပဲ ဆုံးဖြတ်ဖို့ အစီအစဉ်ရှိပါတယ် ဆရာ"

ရာဒယ်လ်က ယဉ်ကျေးစွာ ပြန်ဖြေသည်ကို ကြည့်ပြီး သူ့ကို မနာလိုဖြစ်နေကြသော အုပ်စုမှာ သွားကြိတ်နေကြသည်။ သူတို့မှာ ကိုးယောက်မြောက် မင်းသား လီယွန် (Leon) ၏ နောက်လိုက်များ ဖြစ်ကြသည်။

"အသွင်ပြောင်းမှော်ရဲ့ ဆရာကြီး ပါမောက္ခ အာရိန်းရဲ့ မေးခွန်းကို အခုထိ ဆိုင်းငံ့ထားရဲတယ်ပေါ့!"

"ဒါက ဘယ်လောက်အထိ တန်ဖိုးရှိတဲ့ အခွင့်အရေးလဲဆိုတာ သူ မသိဘူးလား! ကြည့်စမ်း!"

လီယွန်၏ နောက်လိုက်များသည် ‘မှော်စွမ်းအား အဓိကဝါဒီ’ (Magic Supremacists) များ ဖြစ်ကြသဖြင့် ထူးချွန်သော မှော်ဆရာများဖြစ်သည့် အကယ်ဒမီ ပါမောက္ခများကို အလွန်အမင်း ရိုသေကြသည်။ ပါမောက္ခ၏ စိတ်ဝင်စားမှုကို ပေါ့ပေါ့ပါးပါးပင် ငြင်းပယ်နေသော ရာဒယ်လ်၏ ရောင့်တက်သည့် အမူအရာကို ကြည့်ပြီး သူတို့၏ ဒေါသများမှာ လျှံထွက်နေတော့သည်။

သို့သော် ရာဒယ်လ်ကတော့ သူ၏နောက်ကွယ်မှ ပြောဆိုနေသမျှကို ဂရုမစိုက်ပေ။ သူသည် အကဲဖြတ်စစ်ဆေးမည့် တာဝန်များကို တစ်ခုပြီးတစ်ခု လုပ်ဆောင်နေသည်။

ဆင့်ခေါ်မှော်အတန်းတွင်လည်း ဒြပ်စင်တစ်ခုကို အဆင့် ၃ ဆင့်အထိ ပြောင်းလဲနိုင်ခဲ့သဖြင့် ပါမောက္ခ မာရီယန် (Marianne) ထံမှ ချီးကျူးစကား ရရှိခဲ့သည်။

"တော်လိုက်တာ။ ရေခဲကနေ ရေအဖြစ်၊ ပြီးတော့ လေအဖြစ် ပြောင်းလဲတာပဲ"

ဆင့်ခေါ်မှော်အတွက် အကဲဖြတ်တာဝန်မှာ စက္ကန့် ၁၅ အတွင်း မှော်ဒြပ်စင်တစ်ခုကို ၃ ကြိမ် ပြောင်းလဲရန် ဖြစ်သည်။ အချိန်အကန့်အသတ်ရှိသောကြောင့် ပြောင်းလဲလိုသော ဒြပ်စင်၏ ပုံရိပ်ကို လျင်မြန်စွာ စိတ်ကူးပုံဖော်နိုင်သည့် စွမ်းရည် လိုအပ်သည်။

ပုံမှန်အားဖြင့် အလင်းမှ လျှပ်စစ်၊ လျှပ်စစ်မှ မီး ကဲ့သို့သော ဆက်စပ်မှုရှိသည့် ဒြပ်စင်များကို ရွေးချယ်ခြင်းက ပို၍ လွယ်ကူသည်။ စိတ်ထဲတွင် ပုံဖော်ရန် လွယ်ကူသောကြောင့် ဖြစ်သည်။

သို့သော် ရာဒယ်လ်သည် လုံးဝမပတ်သက်ဟု ထင်ရသော ရေနှင့် လေကို ပြောင်းလဲရန် ရွေးချယ်ခဲ့သည်။ ရေကို ဟိုက်ဒရိုဂျင်နှင့် အောက်ဆီဂျင်တို့ဖြင့် ဖွဲ့စည်းထားကြောင်း သိသော ရာဒယ်လ်အဖို့မူ ၎င်းမှာ သိပ်မခက်ခဲလှပေ။ ပါမောက္ခ မာရီယန်သည် အလွန်အထင်ကြီးသွားကာ သူ့ကို ချက်ချင်းပင် အောင်မြင်ကြောင်း သတ်မှတ်ပေးလိုက်သည်။

"သူ အခု အကဲဖြတ်တာဝန်တွေ အကုန်နီးပါး ပြီးနေပြီ မဟုတ်လား?"

"သူ တကယ်ပဲ သူ့စွမ်းရည်တွေကို ဝှက်ထားခဲ့တာ ဖြစ်ရမယ်"

ကောလာဟလများသည် အမှန်တရားများ ဖြစ်လာနေသည်။ ယခုအခါ ရာဒယ်လ်အတွက် ကျန်ရှိနေသော တစ်ခုတည်းသော ဘာသာရပ်မှာ ‘တိုက်ခိုက်ရေးမှော်’ (Combat Magic) သာ ဖြစ်သည်။

ညဉ့်နက်အချိန်။

အကယ်ဒမီ၏ လူသူကင်းဝေးသော နေရာတစ်ခု။ လူနှစ်ဦး လျှို့ဝှက်စွာ တွေ့ဆုံပြီး တစ်စုံတစ်ခုကို လဲလှယ်လိုက်ကြသည်။

"ဒါက အဲဒီ အစီရင်ခံစာလား?"

အာမန်ဒီသည် အမှောင်ထဲတွင် ကိုယ်ကို ဝှက်ထားရင်း ခေါင်းညိတ်ပြလိုက်သည်။ ၎င်းမှာ နန်းတွင်းသားများကို စောင့်ကြည့်ရင်း သူ ကြိုးစားပမ်းစား စုဆောင်းထားသော အချက်အလက်များ ဖြစ်သည်။ သားရဲဘေးထွက်ပစ္စည်းများကို မီးရှို့ပစ်ခဲ့မိသဖြင့် ရှစ်ယောက်မြောက် မင်းသား၏ အရိုက်ခံခဲ့ရသော အာမန်ဒီ၏ နံဘေးမှာ ယခုထက်တိုင် နာကျင်နေဆဲ ဖြစ်သည်။

"……ဒါက တော်တော်လေး ခက်ခက်ခဲခဲ ရယူခဲ့ရတဲ့ အချက်အလက်တွေပါ"

"နားလည်ပါတယ်။ မစ်ရှင်တွေဆိုတာ အမြဲတမ်း ပင်ပန်းရစမြဲပဲလေ"

အာမန်ဒီ၏ စကားကြောင့် ‘စွမ်းရည်စီမံခန့်ခွဲရေးဌာန’ မှ အေးဂျင့်က အရာအားလုံးကို သိနေသလို ပြန်ဖြေလိုက်သည်။ သူသည်လည်း အကယ်ဒမီထဲသို့ လျှို့ဝှက်စွာ ဝင်ရောက်နေသူတစ်ဦး ဖြစ်သည်။

သို့သော် အာမန်ဒီ၏ ခံစားချက်မှာမူ ထိုသူနှင့် မတူပေ။

'အဲဒါ မဟုတ်ဘူး! အဲဒီ အရူးက တကယ်ကြီးကို ကြောက်ဖို့ကောင်းတာ!'

အာမန်ဒီသည် ထိုသို့ အော်ဟစ်လိုက်ချင်သော်လည်း အောင့်ထားလိုက်ပြီး အချက်အလက်များကို ဝေမျှလိုက်သည်။

"အကယ်ဒမီရဲ့ အတွင်းရေးကိစ္စတွေကလွဲရင် ကျောင်းသားသစ်အဖြစ် တက်နေတဲ့ နန်းတွင်းသားတွေရဲ့ အကြောင်းအကုန်လုံးကို ငါ ထည့်ထားတယ်"

"ဒါကို ဌာနချုပ်ဆီ ချက်ချင်း ပို့လိုက်မယ်။ ငါလည်း မင်းကို ပြောစရာ တစ်ခုရှိတယ်"

အာမန်ဒီသည် သူ၏ လုပ်ဖော်ကိုင်ဖက် စကားကို အာရုံစိုက် နားထောင်လိုက်သည်။

"သတိမလွတ်စေနဲ့။ ငါတို့အပြင် တခြား အဖွဲ့အစည်းတွေလည်း ဝင်ရောက်နေတယ်ဆိုတဲ့ သတင်းရှိတယ်"

"မျှော်လင့်ထားပြီးသားပါ"

သို့သော် သူ၏ လုပ်ဖော်ကိုင်ဖက်က အလေးအနက် ထပ်ပြောသည်။

"နန်းတွင်းသားတွေကို ပစ်မှတ်ထားနေတဲ့ လူတွေရှိတယ်။ အခြေအနေပေါ် မူတည်ပြီး ငါတို့ ကြားဝင်ဆောင်ရွက်ရနိုင်တယ်"

ဒါဆိုရင်... နန်းတွင်းသားတွေကို လုပ်ကြံဖို့ ကြိုးစားတာလား?

အာမန်ဒီသည် အခြေအနေ၏ ပြင်းထန်မှုကို သိရှိသွားပြီး မျက်နှာ တည်သွားသည်။ ထိုလုပ်ရပ်မှာ အင်ပါယာကို စိန်ခေါ်ခြင်းပင် ဖြစ်သည်။

"ငါတို့ ဘယ်လောက်အထိ ကြားဝင်ဆောင်ရွက်လို့ ရမလဲ?"

အာမန်ဒီသည် စွမ်းရည်စီမံခန့်ခွဲရေးဌာန၏ အေးဂျင့်တစ်ဦးအဖြစ် သူ၏ တာဝန်ကို မေ့လျော့ခြင်း မရှိပေ။ သူ၏ အဓိက တာဝန်မှာ နန်းတွင်းသားများကို စောင့်ကြည့်ရန် ဖြစ်သော်လည်း၊ သူတို့၏ စစ်မှန်သော တာဝန်မှာ အင်ပါယာအတွက် ဆောင်ရွက်ရန် ဖြစ်သည်။ အင်ပါယာကို အန္တရာယ်ပြုမည့်သူများကို ရှင်းလင်းရန်လည်း ပါဝင်သည်။

အာမန်ဒီ၏ စကားကြောင့် သူ၏ လုပ်ဖော်ကိုင်ဖက်က ခေါင်းခါပြလိုက်သည်။

"လောလောဆယ် မလှုပ်ရှားသေးနဲ့ဦး။ အကယ်ဒမီအတွင်းမှာလည်း မငြိမ်မသက်ဖြစ်မယ့် လှုပ်ရှားမှုတွေကို သူတို့ ရှာဖွေနေပုံရတယ်။ ငါတို့ တည်ရှိမှုကို သိသွားအောင် ပေါ့ပေါ့ဆဆ မလုပ်တာ အကောင်းဆုံးပဲ"

"……နားလည်ပါပြီ"

"မင်းက ရှစ်ယောက်မြောက် မင်းသားရဲ့ အနားမှာ ရှိနေတာဆိုတော့ တုံ့ပြန်ဖို့ ပိုပြီး အဆင်ပြေမှာပါ"

"ဘာကို ဆိုလိုတာလဲ?"

အာမန်ဒီသည် မကောင်းသော အငွေ့အသက်တစ်ခုကို ခံစားလိုက်ရသည်။

"နန်းတွင်းသားတွေကို ပစ်မှတ်ထားနေတယ်လို့ ငါ စောစောက ပြောတယ်မလား? အဲဒီထဲမှာ ရှစ်ယောက်မြောက် မင်းသားက ပစ်မှတ်ဖြစ်နေတယ်ဆိုတဲ့ သတင်းရှိတယ်"

မျှော်လင့်ထားသည့်အတိုင်း မကောင်းသော ခံစားချက်မှာ မှားယွင်းခြင်း မရှိပေ။ အာမန်ဒီ၏ မျက်နှာ ပိုမို တည်သွားတော့သည်။

တိုက်ခိုက်ရေးမှော်အတန်း။

ပါမောက္ခ လီလီယံ မာရှန့် (Lilian Merchent) သည် စင်မြင့်ပေါ်တွင် ပြုံးရွှင်စွာ ရပ်နေသည်။ သူမ၏ ချစ်စရာကောင်းသော ပုံစံနှင့် မလိုက်ဖက်သည့် ကြီးမားလှသော မှော်စွမ်းအားများမှာ ယနေ့တွင်လည်း အစွမ်းပြနေဆဲ ဖြစ်သည်။

"အားလုံးပဲ၊ ဒီနေ့မှာတော့ အကဲဖြတ်စစ်ဆေးမည့် တာဝန်ကို နောက်ဆုံးမှာ ပြောပြတော့မှာပါ!"

နောက်ဆုံးတော့!

၎င်းမှာ ရာဒယ်လ် အရှိဆုံး စောင့်မျှော်နေသော အချိန်ပင် ဖြစ်သည်။ ဒါကို ပြီးမြောက်လိုက်ပါက ကျောင်းသားသစ် လိုက်လျောညီထွေဖြစ်အောင် လေ့ကျင့်သည့်ကာလ၏ အကဲဖြတ်တာဝန်များ အားလုံး ပြီးဆုံးတော့မည် ဖြစ်သည်။

"ပြီးခဲ့တဲ့ အတန်းတုန်းက နင်တို့ တိုက်ခိုက်ချင်တဲ့ ပြိုင်ဘက်ရဲ့ နာမည်ကို ရေးခဲ့ကြတယ် မဟုတ်လား? ငါ အဲဒါကို ထည့်သွင်းစဉ်းစားပြီး အဖွဲ့တွေ ဖွဲ့ပေးထားတယ်"

ပါမောက္ခ လီလီယံသည် ကျောက်သင်ပုန်းဆီသို့ သူမ၏မှော်တုတ်တံကို ဝေ့ယမ်းလိုက်သည်။ ထိုအခါ နှစ်ယောက်တစ်တွဲ အဖွဲ့စာရင်းမှာ ချက်ချင်း ပေါ်လာတော့သည်။

"တချို့လူတွေက အရမ်း နာမည်ကြီးနေတော့ အဖွဲ့ဖွဲ့ရတာ နည်းနည်း ခက်သွားတယ်"

ပါမောက္ခ လီလီယံက ပြောရင်း ရာဒယ်လ်ကို ကြည့်နေသလို ခံစားရသဖြင့် ရာဒယ်လ် သူ၏ပါးကို ကုတ်လိုက်မိသည်။ လူအများကြီးက ငါနဲ့ တိုက်ချင်နေကြတာတော့ မဟုတ်ပါဘူးနော်?

'မဖြစ်နိုင်တာ'

ပါမောက္ခ လီလီယံက ဆက်ပြောသည်။

"အကဲဖြတ်တာဝန်က ရိုးရှင်းပါတယ်။ နင်တို့ နှစ်ယောက်တစ်တွဲ နဂါးတွင်း (Dungeon) ထဲကို ဝင်ပြီး ‘တောက်ပနေတဲ့ မှို’ (Glowing Mushrooms) အချို့ကို ခူးလာခဲ့ရုံပါပဲ။ လွယ်တယ် မဟုတ်လား?"

သို့သော် ကျောင်းသားသစ်များသည် ပါမောက္ခ လီလီယံ၏ စကားကို မယုံကြည်ကြတော့ချေ။ ပြဿနာမှာ အဖွဲ့ဖွဲ့စည်းပုံ ဖြစ်သည်။ တိုက်ခိုက်ချင်တဲ့ ပြိုင်ဘက်နဲ့ တစ်ဖွဲ့တည်း ဖြစ်ရတာတဲ့။ စိတ်တူကိုယ်တူ သူငယ်ချင်းချင်းတောင် နဂါးတွင်းတစ်ခုကို ဖြတ်ကျော်ဖို့ဆိုတာ မလွယ်ကူလှပေ။

"ငါတို့ သွားမယ့် နဂါးတွင်းက အကယ်ဒမီအတွင်းမှာ ရှိတဲ့ တစ်ခုပါ။ သားရဲတွေတော့ ရှိမယ်၊ ဒါပေမဲ့ နင်တို့အားလုံး အလွယ်တကူ လုပ်နိုင်မှာပါ။ ဘော့စ် (Boss) ကို တိုက်ခိုက်ရမှာ မဟုတ်ပါဘူး၊ မှိုပဲ ခူးရမှာပါ"

ရာဒယ်လ်ကတော့ ထိုအလုပ်မှာ ဖြစ်နိုင်သည်ဟု တွေးမိသည်။ သို့သော် သူ၏ အတန်းဖော်များ၏ မျက်နှာမှာမူ မကောင်းလှပေ။ သူတို့အနက် အများစုမှာ နဂါးတွင်းထဲသို့ တစ်ခါမှ မဝင်ဖူးကြသူများ ဖြစ်သည်။ ထို့ကြောင့် သူတို့ စိုးရိမ်နေကြသည်မှာ သဘာဝပင်။

သို့သော် ပါမောက္ခ လီလီယံ၏ မျက်နှာမှာမူ အလွန် တောက်ပနေသည်။

"တိုက်ခိုက်ချင်တဲ့ ပြိုင်ဘက်နဲ့ အတူတူ လေ့လာရင်း အချိန်ဖြုန်းရတာ တကယ်ကို ကောင်းမှာပဲ မဟုတ်လား?"

ပါမောက္ခ လီလီယံက စိတ်လှုပ်ရှားနေသကဲ့သို့ ပါးလေးများ နီမြန်းလျက် ထပ်ပြောလိုက်သည်။

"ပြီးတော့ နင်တို့ တကယ် တိုက်ခိုက်ဖြစ်ရင်လည်း ဖြစ်သွားနိုင်တာပဲ! စိတ်ကူးကြည့်ရုံနဲ့တင် တကယ် မိုက်တယ် မဟုတ်လား?"

နဂါးတွင်းထဲမှာ တိုက်ခိုက်ကြခိုင်းတာလား? သူမသည် တကယ်ကို အန္တရာယ်များသော လူတစ်ယောက် ဖြစ်သည်ဟု တွေးရင်း ရာဒယ်လ်သည် သူ၏နာမည်ကို ရှာဖွေလိုက်တော့သည်။